EITBren 2020-2030 plan estrategikoaren ildoari jarraituta, argi ikusi genuen gure ikus-entzunezko eskaintza osatzeko eta teknologiarekiko eta eduki digital natiboekiko konpromisoa sendotzeko beharra genuela, belaunaldi berriek, kontsumo ohitura berriek, hedatzeko bide berriek eta teknologia berriek horretara eramanda.
Horretaz guztiaz jabetuta, hainbat soluzio digital garatu ditugu, gure ikus-entzunezko eskaintza osatzeko eta euskal herritarren aurrean dugun posizionamendua hobetzeko, batez ere gazteenen aurrean, kontsumo-esperientzia hobeak izan ditzaten. Hiru helburu argi ditugu:
Hasteko, lehentasun bat aipatu behar dut: euskal edukiak bermatzea, bereziki euskarazko edukiak, ikus-entzunezko testuinguru digitalean.
Bigarrenik, eraginkorragoak izatea gure posizionamendu estrategian, eta atarramendu handiagoz hurbiltzea biztanle-target (xede-biztanleria) eta profil desberdinetara.
Eta, azkenik, lehiakorragoak izatea euskal gazteengana hurbiltzeko estrategian.
Estrategia horrek guztiak Nire eitb komunitate digitalean 1.000.000 pertsona (erregistratutako erabiltzaile) biltzeko aukera eman beharko liguke.
Hor dago etorkizuneko bideragarritasunaren eta ikusgarritasunaren bermea EITB taldearentzat, eta hor dago, era berean, EITBren betiko izanari eusteko gakoetako bat. EITB gure herriko erreferentziazko komunikazio-taldea da, inguruneko, sektoreko eta euskal gizarteko aldaketetara egokitzen jakin izan duen taldea.
Dakizuenez, ibilbidea PRIMERANekin hasi genuen, euskarazko premium edukien plataformarekin. Arrakasta handia izan du, 194.000 erabiltzaile baino gehiago erregistratu baitira, eta milioi bat ordu baino gehiago eman baititu euskaraz.
MAKUSI izan zen hurrengoa, haur eta gaztetxoei zuzendutako unibertso digitala. Gurasoen konfiantzari eta eskaintzen dituen eduki eta jardunei esker, 170.000 kontaktu metatuko reach-a (irismena) dauka; alegia, LTDa, OTTa, fisikoa, kluba eta telebista batuta, 14 urtetik beherako biztanleen % 75 erakartzen ditu gutxi gorabehera. Horri erantsi behar zaio euskaraz 1,8 milioi ordu baino gehiago kontsumitu direla; eta hori guztia, bi urte eskasetan.
GUAU etorri zen ondoren, gure audio plataforma. Urtebete eskasean, 280.000 erabiltzaile aktibo baino gehiago lortu ditu, eta 1,4 milioi orduko kontsumoa izan du, horietako zati handi bat euskaraz.
Web atarien esparruan, dxp teknologia sartu dugu, digital experience platform delakoa, kontsumo digitalaren esperientziak hobetzen dituena, interaktibitate handiagoaren eta pertsonalizazio hobearen bidez. Adoberen teknologia hau Hiberus enpresa garatzen eta inplementatzen ari da, eta guretzat poz handien iturri izatea espero dugu.
MAKUSIren atariarekin hasi ginen Hiberusekin elkarlanean, eta Gaztearen webgunearekin jarraitu. Hain zuzen ere, oraintxe bertan, Gaztea markarekin ari gara lanean. Ekosistema propio bat sortu nahi dugu, musikarekin loturiko eduki eta ekitaldietan espezializatua, gazteen targetean lehiakorragoak izateko helburuz.
Duela oso gutxi, EITB taldearen beste apustu handi batek ikusi du argia: ORAIN, EITBren informazio marka digitala. 8 hilabete eskasetan, erreferentziazko marka bilakatu da, 1.300.000 pertsonako populazio digitalarekin, eta gure herrian informazio liderra izateko aspirazioa du.
Kirolakeitb.eus, 2026ko urtarrilean aurkeztu berri da. Kiroletan berezitutako dxp atari berria orain arte kirol-erredakzioan sortu izan den eskaintza digitala osatzera dator. Batez beste, 400.000 pertsonatik gorako populazio digitala lortzen ari da eduki mota hori.
Eitb.eus berrituarekin burutu dugu gure web inguruneen eskema. Webgunea Taldearen eduki digitalen agregatzaile handi bat izango da, baina pertsonalizatzeko gaitasun handia ere izango du, edozein euskal herritarrek bere erara antola dezan bere egunerokoan behar duen zerbitzu publikoko informazio guztia.
Datuek erakusten dute ez goazela bide txarretik. Nabarmen gaztetu dugu adin-kurba gure plataformetan. Euskarazko 29.000 asset (eduki) baino gehiagoko katalogoa sortu dugu, eta hilean 400.000 ordu baino gehiagoko kontsumo agregatua izan dugu gure plataformetan, ehuneko handi batean euskaraz.
Ginga ETB On plataforma berriarekin jartzea espero dugu. ETB On EITB taldearen telebista digital bihurtzeko helburuarekin jaio da. Nahieran plataforma historikoa birformulatu eta etorkizunera begira jarri du EITBk, diseinua kontsumo eredu berrietara bideratuta, OTTrik onenen pare. Ikus-entzunezko kontsumo-eredu berrietara, batez ere gazteek dituzten ohituretara egokitzeko estrategian, ETBk balio erantsi teknologiko handiko eta audientzietara erraz iristeko moduko plataforma digital baten alde egin du. ETB Onek nahierako telebistaren kontzeptua barneratu eta aurrerago eraman du. ETB osoa plataforma digital batean jarri du, OTTrik onenen erabiltzaile esperientziarekin. Soluzio multimedia bat da, nahi duzuna, nahi duzunean, nahi duzun lekuan kontsumo-kontzeptua eguneratu duena.
Urtarrila bukatzear dagoela, emaitzak ezin ikusgarriagoak dira. Hilabetearen amaieran, 100.000 erabiltzaile erregistratu edukitzea espero dugu, eta 300.000 kontsumo-ordu baino gehiago eskaini izana.
Emaitzak arrakastatsuak dira EITBk abian jarritako plataformetan, eta horrek hauspoa ematen digu lanean gogor jarraitzeko. Gure nahia da euskal gizarteari ikus-entzunezko eskaintzarik onena eta balio proposamenik onena helaraztea eta, modu horretan, beraren beharrizan berriak asetzea.
Orain.eus abian da
Iker Gonzalez Rodriguez
EITBren albistegi digitaleko burua
Azken urteetan aldaketa handiak izan dira esparru digitalean, edukiak beste modu batean kontsumitzen direlako online. Aldaketa nagusia aspaldi identifikatu genuen, 10 erabiltzailetik zortzi inguruk telefonoa erabiltzen zuen gurean albisteak irakurtzeko, baina gure webgunea eta gure tresnak mahaigaineko kontsumora egokituta zeuden.
Horrezkero, euskarriak berak, telefonoak, bestelako narratiba batzuk ezarri ditu, berezko ezaugarriengatik, eta sare sozialetan edukiak kontsumitzeko nagusitu den modu berriengatik. Horietan garrantzitsuena bideo laburra da, formatu bertikalean, eta guk narratiba berri horiek jasotzeko tresnak behar genituen.
Beste alde batetik, EITBren informazio zerbitzu digitala diseinua berritzeko beharrean zegoen, eta Orainek, ordura arte soilik Instagramen eta WhatsAppen bidea hasi zuen marka berriak, zegokion jauzia eman behar zuen eta web gune berria garatu.
Garapen horretan murgilduta egon gara buru belarri urte eta erdi inguru eta, azkenik, webgune berria eta sakelako telefonorako app-a kaleratu genituen ekainaren 18an.
Web gune berriak, oraingoan bai, badauzka behar horiei guztiei erantzuteko tresnak eta funtzionalitateak, erabiltzaileari gure atarian zehar egiten duen ibilbidea errazteko, eta edukiak ahalik eta modu egokienean eta eraginkorrenean aurkezteko.
Erabiltzaileak interesatzen zaizkion gaiekin Zuretzat atala bere lehentasunen arabera antolatu dezake, eduki gogokoenen zerrenda osatu, baita streaming bat hastear denean abisua jaso ere, besteak beste.
Bestalde, emaitza esanguratsu batzuk ere utzi dizkigu Orainek ekainetik abendura bitartean webgunea eta aplikazioa abian jarri zirenetik. Webguneak 200.000 erabiltzailetik gora ditu, batez beste, hilero; 84.000 harpidedun sare sozialetan eta orotara, 1,3 milioiko populazio digitala.
Orainen ibilbidea sare sozialetan
Euskal esparruan, zein nazioartean, sareak bihurtu dira herritarren informazio iturri nagusia.
Hazkunde handia izan du Orain markak 2025ean sareetan, eta gure presentzia zabaldu egin da nabarmen.
Instagram izan da urte osoan, hilabetez hilabete, gehien hazi den sarea, Orainen kasuan. Gainera, urteko azken hiruhilekoan areagotu egin da hazkundea, eta aldi horretan % 10 inguruko gorakada izan du hilabetero.
Nabarmentzekoa da, halaber, Youtubeko kanalak ere aireratu genituela urte hasieran, eta 2026ko apustu estrategikoetako bat izango dela, Tik Tok-eko kontuekin batera.
GUAUren urtebetetzea: EITBren audioak etorkizunera jauzi egin du
Maite Goñi Eizmendi
EITBko Irrati eta Audio zuzendaria
2025eko otsailaren 6an, EITBk Guau bere audio-plataforma jarri zuen martxan. Helburua argia zen: EITBren audioa antolatu, digitalizatu eta etorkizunerantz proiektatzea, entzuteko ohitura berrietara egokituz, irratiaren, kulturaren eta zerbitzu publikoaren esentzia galdu gabe. Urtebete geroago, Guau proiektu bizi gisa finkatu da, etengabeko hazkundean, eta EITBren apustu estrategiko garrantzitsuenetako bat da eremu digitalean.
Guau publiko gaztearekin eta heldu gaztearekin konektatzeko asmo argiarekin jaio zen, bereziki 35-40 urtetik beherakoekin, irratietako betiko entzuleak atzean utzi gabe. Plataforma elebiduna da, euskarazko eta gaztelaniazko edukiak biltzen ditu, eta euskara bultzatzearen aldeko apustu sendoa egiten du: enkarguzko edukien % 80 euskaraz ekoizten dira, eta % 20 gaztelaniaz, ingurune digitalean euskarazko audio-sorkuntza indartuz.
Katalogo anitza, etengabe hazten ari dena
Bere lehen urtean, Guauk katalogo sendo eta anitza osatu du. Alde batetik, EITBko irrati guztietako –Euskadi Irratia, Radio Euskadi, Radio Vitoria, Gaztea, EITB Musika eta Euskal Kantak- edukia entzun daiteke Guaun, zuzenean edo nahieran. Bestetik, aztertze, hautatze eta berrantolatze lan sakon baten ondoren, aurretik EITBPodkast plataforman zegoen katalogoa ekarri da, katalogo koherente eta berritu baten oinarriak finkatuz.
Oinarri horren gainean, 2025ean, Guauk 67 podcast original argitaratu ditu, horietatik 54 euskaraz eta 13 bideopodcast formatuan ere kontsumitu daitezkeenak. Eskaintza horri beste erakunde kultural edo jaialdien podcastak gehitzen zaizkio, lankidetza-ekosistema zabalduz eta plataformaren izaera kulturala indartuz.
Soinu-fikzioa Guauren lerro bereizgarrienetako bat bezala finkatu da. Plataformak 12 soinu-fikzio aktibo ditu, horietako lauk hiru denboraldi dituzte. 2025ean, bederatzi fikzio edo denboraldi berri argitaratu dira. Horiei irrati-nobelen katalogo zabala gehitu behar zaie (22 guztira), plataforman arian-arian urtean zehar txertatuta.
Aldi berean, Guauk audioliburuaren aldeko apustua indartu du, hamaika izenburu berri argitaratuz, guztira 21 audioliburu eskainiz. Ildo hori bereziki bultzatu da Euskal Literaturaren Hilabetean, Poesia ttanttak bezalako ekimenekin batera, euskal autore ezagunen soinu-poemen bilduma, kasu gehienetan sortzaileek beraiek Guaurentzat berariaz aukeratutako antologietatik abiatuta.
Katalogoaren eta entzuteko esperientziaren aldeko apustu hori kontsumo-datuetan ere islatzen da. Bere bizitzako lehen urtean, Guau bereziki nabarmentzen da entzuketa-orduen bolumenagatik, metatutako kontsumo-denbora gehien duen EITBko plataformetako bat baita. 2025aren amaieran, Guauk 1,4 milioi ordu baino gehiagoko kontsumoa erregistratu du, eta horietatik 900.000 inguru euskarazko edukiei dagozkie. Datu hori bereziki esanguratsua da sortu berri den plataforma batean.
Estreinaldiak, gertaerak eta errekonozimendua
Hasieratik audioaren eta ikusizko formatuaren arteko elkarbizitza naturala markatu du Guauk, beti ere, audioa erdigunean kokatuta. Horrela, estreinatu ditu 2025ean zehar Eneagrama, Klaketa, Café Valparaíso edo BaDAbil! bezalako bideopodcastak.
Halaber, Guauk gertakari kulturalei lotutako estreinaldien aldeko apustua egin du. Urtean zehar espazio sinbolikoei lotutako estreinaldiak bultzatu dira, hala nola leku enblematikoetan girotutako – San Mames estadioa, esaterako- edo San Telmo museoan aurkeztutako soinu-fikzioak, soinu-sorkuntzaren eta lurraldearen arteko harremana indartuz.
Kalitatearekin eta berrikuntzarekin hartutako konpromiso horrek kanpo-errekonozimendu nabarmena ere izan du, urteko podcast onenaren Ondas Saria lortu baitzuen Se llamaba como yo koprodukzioagatik.
Bilakaera teknologikoa eta erabiltzaile-esperientzia
Plataforma bizia da Guau hasieratik, etengabeko bilakaeran dagoena. Lehen urte honetan funtsezko hobekuntzak sartu dira, entzuteko esperientzia hobetzeko eta plataforma anitzeko izaera indartzeko. Horien artean, ikusizko irrati edo irrati bisualaren integrazioa nabarmentzen da, zeinak aukera ematen baitu irudia aktibatzeko irratien streamingean eta kanpoan egiten diren saioetan. Telebistarako (HbbTV) zein autorako (iOS eta Android) aplikazioen garapena ere azpimarratzekoa da, garapen teknologikoei dagokienez.
Plataformak, gainera, eduki guztiak automatikoki transkribatzeko zerbitzuak sartu ditu, jatorrizko hizkuntzan nahiz euskarara edo gaztelaniara itzulita, edukien eskuragarritasuna eta ulermena indartuz. Lehen urte honetan, proiektu pilotuen bidez, audio-edukien sorkuntzari eta sustapenari aplikatutako adimen artifizialaren erabilera arduratsua ere esploratu da.
Proiektu kolektiboa, etorkizunari begira
Katalogotik eta teknologiatik harago, Guau ahalegin kolektibo eta transbertsal baten emaitza da. EITBko irratiek egunero elikatzen dute plataforma eduki, podcast berezi eta gaurkotasun-klipekin, eta podcast taldearekin koordinatuta lan egiten dute audio-katalogo bakarra eraikitzeko. Elkarlan horrek aldaketa sakona ekarri du audioa ekoizteko, ordenatzeko eta eskaintzeko moduan.
2026ra begira, Guauk euskarazko soinu-fikzioa indartzen jarraituko du eta baita literatura eta euskal kultura bultzatzen ere, sortzaileekin elkarlanean. Horrekin batera, gazte talentuaren aldeko apustua egingo du podcast eta bideopodcast pilotuak eta ideiak sustatzeko sari berri bat abian ipiniz eta Audiogile Berriak soinu-fikziorako euskarazko gidoigintza sustatzeko ekimenarekin jarraituz.Plataformak bere ildo musikala ere indartuko du, irratiak, podcasta eta musika integratuz, eta euskarazko eduki errazak esploratuko ditu hizkuntza ikasten ari diren pertsonentzat.
Kaleratu eta urtebetera, Guau proiektu eraldatzaile, kolektibo eta eboluzioan dagoen proiektu gisa finkatu da, etorkizunari anbizioz begiratzen diona. Sinetsita gaude audioak oraindik ere berrikuntzarako, kulturarako eta zerbitzu publikorako espazio gisa ibilbide luzea duela.
PRIMERAN: 2025. urteko laburpena eta 2026. urteko helburuak
Iraide Muga Zubiaur
PRIMERANeko burua
2025. urtea PRIMERAN proiektua sendotzeko eta egonkortzeko epealdia izan da. Plataforma euskal ikus-entzunezkoen ekosisteman erabat txertatu da, euskarazko edukien erreferente nagusi gisa. Hauek izan dira mugarri nagusiak:
- Filmak eta telesailak: Fikziozko edukiek markatu dute plataformaren kalitate-zigilua. Desagertuta eta Zeru Ahoak telesailek harrera bikaina izan dute erabiltzaileen artean. La Infiltrada filmaren estreinaldia (euskarazko bertsioan) mugarri garrantzitsua izan da, eta Cristóbal Balenciaga bezalako apustuek plataformaren kalitate-lerroa markatu dute.
- Musika edukiak: Musika urteko edukirik eskatuenetako bat bihurtu da. ZETAK eta ETS bezalako taldeen inguruko proiektuek publiko gaztea erakarri dute, plataformari joera berriekiko lotura zuzena emanez.
- Estrategia digitala eta sare sozialak: Instagram sare nagusi gisa finkatu da, edukia balioan jarriz eta gomendio-sare indartsua sortuz. Aldi berean, TikTok eta YouTube kanaletan estrategia berezituak abiarazi dira oihartzun digitala biderkatzeko.
Datu kuantitatiboei dagokionez, 2025. urtean zehar, plataformak hazkunde etengabea eta jasangarria erakutsi du:
- Kontsumoa: Guztira 694.000 ordu kontsumitu dira, aurreko urtean baino 50.000 ordu gehiago.
- Kontuak: 194.000 erabiltzailerekin amaitu du urtea plataformak (50.000 erregistro berri lortu dira; hilean, batez beste, 5.000 erabiltzaile berri inguru gehituz).
- Erabiltzaileak: Erabiltzaile aktiboen kopuruak joera gorakorra izan du urte osoan zehar, plataformaren estreinaldi-garaiko zifrak gaindituz.
2026rako helburu estrategikoak
2026rako erronka nagusia da lehiakortasun maila igotzea eta euskarazko ikus-entzunezkoen kontsumoa gizarteko geruza guztietara hedatzea. Bereziki, gazteengana modu erakargarrian iristea izango da helburua. Hauek dira ardatz nagusiak:
Eduki eskaintza: Fokua ekoizpen propioan eta euskal fikzioan mantenduko da. Eskaintza hau kalitate goreneko nazioarteko edukiekin osatuko da, komunitate espezifikoak erakartzeko helburuarekin.
Markaren indartzea: Markaren balioak eta promesa finkatzea, haren ezagutza eta ospea gizarte mailan zabaltzeko eta euskarazko kalitatezko edukien plataforma erreferentea izateko.
Komunitatea: Plataformatik harago komunitate fidel bat sortzea, PRIMERAN unibertsoa hedatzeko eta erabiltzaileekin lotura emozionala estutzeko.
Erabiltzailearen esperientzia eta pertsonalizazioa: Plataformaren erabilgarritasuna hobetzen jarraituko da, pertsonalizazioan eta gomendioetan sakonduz.
Promozioa eta Enbaxadoreak: Edukien mailako promozio-kanpaina indartsuak garatuko dira. Horrez gain, enbaxadoreen kontzeptua eta aliantza estrategikoak landuko dira unibertso digitalean oihartzuna biderkatzeko.
Proiektua sendotzeko urtea izan da MAKUSIn
Nerea Zendoia Elexpuru
MAKUSIko burua
2024. urtea abiapuntua izan bazen MAKUSI unibertsoarentzat, 2025a batik bat proiektua sendotzekoa izan da. EITBk sortutako haur eta gaztetxoentzako ekosistema zutabe eta oinarri sendoak dituen egitasmoa bilakatu da, emaitza nabarmenak lortuta: 80.000 profil sortuta eta 1,8 milioi ordu ikusita plataforman, datu batzuk aipatzearren.
MAKUSIk gure hizkuntzan eta kulturan murgiltzeko aukera eskaintzen die haur eta gaztetxoei, euskarazko edukien eskaintzarik onenarekin eta teknologiarik puntakoena erabilita, gailu eta ingurune guztietatik sartu ahal izateko. Urte honetan zehar hainbat eduki estreinatu dira Makusi plataforma digitalean, kideen klubak abantaila, zozketa eta ekimen bereziak eskaini ditu, eta kaleko hainbat ekitaldiz eta ikuskizunez gozatzeko aukera izan da.
2025eko mugarri nagusiak
Plataforma digitala
MAKUSI plataforma digitalak haur eta gaztetxoentzako askotariko ikus-entzunezko eskaintza jaso du 2025ean, euskaraz; laburbilduz, hauek izan dira estreinatu diren izenburu nagusi batzuk: Txakur Patruila, Ninja Dortokak, Loa eta Laia, Dragoi Bola eta Ladybug animazioan; Potx eta Lotx, Kalaxka, Mari Sorgin ehiztari, Ameslarien Banda, Power up, Go!azen, Irabazi Arte, saio propioen kasuan; Munduenea izeneko podkasta, eta azkenik, Gora Musika Erraldoia, Maite Zaitut festa erraldoia eta Makusi Jaia zuzeneko ikuskizunak zein Heidi, katamotzaren erreskatea pelikula.
Kideen kluba edo komunitatea
MAKUSI klubeko kideek abantaila mordoa dituzte: doako sarrerak, zozketak, lehiaketetan parte hartzeko aukera, etab. Denetariko zozketak izaten dira, eta aurten egin den aipagarrienetako bat Gau Beltzean Port Aventura World parkera joateko bidaia izan zen. Hortaz, MAKUSI klubaren bidez, umeen parte hartzea eta komunitatearen parte izatea bultzatzen dira.
Ekitaldiak eta ikuskizunak
2025ean zehar ekitaldi ugaritan hartu du parte MAKUSI guneak: Ikastolen zein Euskal Eskola Publikoaren aldeko jai guztietan, Eskola Txikien jaian, Sanferminetan eta Bilboko Aste Nagusiko Txikigunean, esaterako. Halaber, bere ekitaldi propioak ere antolatu ditu: Makusiren urteurren ekitaldia, Makusi Jaia (egun osoko jaia BECen), eta Makusi Gabon Festa (lau ikuskizuneko bira hiriburuetan). Bada, ekitaldi horiei guztiei Go!azen 12 aurrestreinaldiak gehituta, 40.000 lagunek izan dute MAKUSI unibertsoarekin hartuemana kalean, pantailatik harago joanda.
2025a zenbakitan
- Erregistro kopurua: 80.000 profil eta 75.200 kontu
- Kontsumitutako ordu kopurua: sortu zenetik 1,8 milioi ordu, eta 2025ean: 1,4 milioi ordu
- Klubeko kideak guztira: 31.763 kide
- Ekimenak: 2025ean kaleko ekitaldi eta ikuskizunetan 40.000 lagun batu ditu Makusi unibertsoak
2026ra begira
Helburu kuantitatiboei dagokienez, alde batetik, helburua da plataformako erregistro kopurua zein klubeko kide kopurua handitzea 2026an, plataforman 10.000 erregistro gehiago lortuz, eta klubean 35.000 kide izatera iritsiz.
Bestalde, plataforma fidelizatu eta sendotzea helburu hartuta, estreinaldi aipagarriak izango dira hasi berri dugun urtean: Pottokiak 3D, Potx eta Lotx, Kalaxka, Kima eta Amik, Papir-o!, Zientzia Piztia, Henry Danger, etab. Eduki estrategiari dagokionez, batik bat, azpimarra jarri nahi da animaziozko titulu ezagunetan, saio propioen denboraldi berrietan, eta baita hezkuntza edo kutsu pedagogikoa duten eduki eskaintzan ere.
Lehentasunezkoa izango da, halaber, komunitate sentimendua areagotzea, eta horretarako kideei zuzendutako abantaila eskaintza ugaritzeaz gain, lotura emozionala sortzea bilatuko da, ekimen ezberdinen bidez. Zentzu horretan, ekitaldi eta ikuskizunetan indarra jarri nahi da aurtengoan ere, Makusi Gunea aktibatuz ume eta gaztetxoentzako jada esanguratsuak diren jaietan, zein ekitaldi eta ikuskizun propioak antolatuz MAKUSIren eskutik.
Hortaz, MAKUSI unibertsoak sendotasuna hartu du joan den urte honetan eta bide horretan jarraitu nahi du datorrenean ere. Haurrentzako lehiakorra, gurasoentzako segurua eta gizartearentzako erreferentziazkoa den ikus-entzunezkoen ekosistema digital lehiakorra eta euskarri anitzekoa sendotzea izango du helburu, gure kultura eta hizkuntza sendotzen dituena, eta umeen interakzioa eta parte-hartzea sustatuko dituena, hartara, etorkizuneko komunitate digitala sortuz, ume eta gaztetxoentzako euskarazko unibertso erreferentea izanik.